‏إظهار الرسائل ذات التسميات حوار ع الهوا. إظهار كافة الرسائل
‏إظهار الرسائل ذات التسميات حوار ع الهوا. إظهار كافة الرسائل

الجمعة، 13 يونيو 2008

عــودة صلاح الدين



عـودة صلاح الدين


كلنا عارفين طبعاً اٍن العالم العربى فى الوقت الحالى غير مستقر تماماً

و مش بس كده الظلم ساد والاٍحتلال رجع تانى بس منظور تانى

وقهر واستعباد وبلاوى منيله بنيله

فى رأى أهم هذه الأحداث

الأقصى الأسير

الغريب فى الموضوع ده

انك لو اتكلمت مع حد عن الأقصى الأسير وعن الأحداث

الجارية حالياً فى فلسطين

تلاقيه يقولك القدس مش هيتحرر غير لما يرجع صلاح الدين

وبنشوف ونسمع شعارات كتير منها

مثلاً خيبر خيبر يا يهود صلاح الدين سوف يعود

طيب بالعقل كده هو اللى بيموت بيرجع تانى ؟؟

طبعاً لا

طيب ايه حكاية عودة صلاح الدين من جديد

من وجهة نظرى المقصود بعودة صلاح الدين يعنى

ميلاد صلاح الدين من جديد

طفل جديد يتولد ويكبر ويبقى صلاح الدين

كل ده ليه عشان يحرر القدس

كل ماافكر فى الموضوع ده أسأل نفسى أسئلة كتيرة ياترى ياهل ترى

هو صلاح الدين الجديد اٍتولد ولا لسه ؟

طيب هو منين ؟ يعنى مصرى ولا فلسطينى ولا سعودى ولا عراقى

ولا لبنانى ولا جزائرى ولا سودانى ولا منين بالظبط ؟؟

طيب ليه ميكونش صلاح الدين الجديد ده اٍتولد بالفعل وليه ميكونش

شاب دلوقت

وليه ميكونش أنا مثلاً أو حد من أصحابى أو حد أعرفه


وممكن يكون مش مصرى ومعرفوش أصلاً

طبعاً هو مسلم طيب هيكون سنى ولا شيعى ؟

طيب طريقة تفكيرة هتكون زى عمرو خالد كده

ولا ممكن تشبة طريقة تفكير الشيخ محمد حسان أو محمد حسين يعقوب

وليه ميكونش يشبه حسن نصر الله

طيب ياترى يشبه مين ؟؟

طيب اٍسلوب كلامه عادى زينا كده ولا باللغه العربية الفصحاء

طيب طريقة لبسه ياترى هتكون ازاى

هيلبس جلابيه بيضاء ولا بنطلون وقميص ولا بدله ولا ايه بالظبط ؟

طيب تسريحة شعره هتبقى ازاى ؟

طيب هيبقى خريج ايه هل ياترى تجارة زى حالاتى ولا حقوق ولا طب

ولا هندسة ولا أصول دين أو شريعه أو فنون جميلة ؟

طيب أكيد هيبقى معاه موبايل ياترى موبايله نوعه ايه ونغمة الموبايل ايه ؟

طيب لو اٍفترضنا اٍنه موجود حاليا ً هيحرر القدس لوحده ولا هيبقى معاه جيش ؟

طبعاً هيبقى معاه جيش

طيب هل فى جيش؟

أكيد فى بس مش متحمس أو مش غيور على الأقصى الجريح

طيب ياعم علاء انت عمال تسأل عن صلاح الدين وموصفاته

عايز تقول ايه وتقصد ايه

أقولكم أقصد ايه ودى وجهات نظر

أقصد ان ليه مكونش انا صلاح الدين وصاحبى صلاح الدين

وابويا صلاح الدين واخويا صلاح الدين وجارى صلاح الدين

والمسئول فى بيته صلاح الدين وفى شغله صلاح الدين

وفى حياته كلها يبقى صلاح الدين والست اٍبنها يبقى صلاح الدين

وجوزها يبقى صلاح الدين وأخوها يبقى صلاح الدين

بالراحة علينا ياعم وقول تقصد ايه

أقصد اٍننا عشان نغزو العالم وعشان نحرر القدس

ده مش بالسهل

لازم فكر جديد وحياة جديدة ومتفهمونيش غلط بفكر جديد

لازم ثقافة جديدة لازم نغير من نفسنا

لازم يبقى عندنا وعى واٍدراك كامل

يعنى عشان نبقى متقدمين ونجبر العالم كله على اٍتباع سياستنا

ده مش سهل من وجهة نظرى

كل واحد مننا يأهل نفسه على اٍنه يبقى هو صلاح الدين

يعنى لازم صلاح الدين يبقى موجود فى كل بيت

الطفل لما يتولد لازم يتربى على اٍنه هو ده صلاح الدين

مش لمؤاخذه يتربى على الكليبات والأغانى والأفلام والموضه

وطبعاً مش هينفع يتربى على كده الا لما يبقى أبوه كده وعمه كده

وأخوه كده وجاره كده يعنى لازم كلنا نغير من نفسنا

عشان يبقى عندنا مجتمع كويس وصالح ومنتج ومتدين وقوى

وأهم شئ اٍنه لازم كل طفل يتولد ويتربى على الاٍخلاص

الاٍخلاص فى تفكيره و فى مزاكرته وفى حياته وفى كلامه

عشان لما يكبر يبقى مخلص فى شغله ومخلص فى بيته

وبكده لما يجى بقى صلاح الدين الجديد اللى هيحرر القدس

يلاقى جيش قوى يلاقى جيش مخلص


يا مسلمين !! ياعرب !!


اٍمتى بقى هنرجع الأقصى ؟


قبل مايرجع الأقصى لازم الخباز يكون مخلص فى عمله والسباك

مخلص فى عمله والنجار مخلص فى عمله والدكتور والمهندس

والساعى والموظف والمدير والمزارع وعسكرى المرور

والمسئول الكبير بتاعنا مخلص فى عمله

لازم نبقى كلنا مخلصين عشان

نقدر نرجع الأقصى الأسير

أخيراً

نحن قوم أعزنا الله بالاٍسلام فاٍن اٍبتغينا العزة بغيره أذلنا الله


.............................................

علاء سيد